Bunchúrsa sa Chultúr Dúchais, cúrsa coicíse, leibhéal 1
Cúrsa dhá lá déag é seo. Ritear an cúrsa seo do ghrúpaí ó Ollscoileanna i Meiriceá. Tabharfaidh an cúrsa seo bunús do dhaoine i seandálaíocht, i litríocht, i dteangacha Ceilteacha, i spioradáltacht, i mbéaloideas, i gceol agus in oidhreacht na hÉireann, ag baint leasa as an traidisiún beo i gCorca Dhuibhne. Thart ar 40 uair a' chloig teagaisc i modh idirdhisciplíneach atá i gceist leis an gcúrsa seo agus tugann sé tuiscint chuimsitheach ar an gcultúr, an oidhreacht, an litríocht ar an teanga, idir shean, mheán agus nua.
Dátaí: An chéad choicíos in Eanáir, an tseachtain deiridh de Bhealtaine agus an chéad sheachtain de Mheitheamh, an coicís deiridh de Mheán Fhómhair
Costas: 590 euro

Cúrsa seachtaine i Spioradáltacht agus i Miotaseolaíocht Dúchais na hÉireann
Cúrsa seachtaine is ea é seo a bheadh oiriúnach do dhaoine gur spéis leo laethanta saoire cultúrtha agus spioradáltachta i gCorca Dhuibhne. Dhá lá de thurasanna agus trí lá de léachtaí ar spioradáltacht agus miotaseolaíocht a bheidh i gceist leis an gcúrsa seo. Trí na léachtaí, turasanna agus imeachtaí cultúrtha gheobhaidh na rannpháirtithe blaiseadh den scéalaíocht, den litríocht bhéil, den liotúirge Ceilteach agus den spioradáltacht a bhaineann leis an leithinis. Déanfar turasanna chuig tobair naofa, chuig láithreacha réamh- agus luath- Chríostaí agus chuig suíomhanna aitheanta sa leithinis chomh maith.
Dátaí: An tseachtain deiridh de Mhárta
Costas: 360 euro

Cúrsa seachtaine sa Léann Dúchais:
Litríocht na Sean-Ghaeilge, Dlithe na mBreithiún agus Finscéalta
Cúrsa cúig lá é seo atá oiriúnach d'éinne gur spéis leo staidéar a dhéanamh ar ghnéithe an-ársa de chultúr na hÉireann. Díreofar isteach ar litríocht na Sean-Ghaeilge, Dlithe na mBreithiún agus na finscéalta a bhaineann leis an sean-ré. Léachtaí, turasanna sa leithinís, agus imeachtaí cultúrtha a bheidh sa chúrsa seo agus gheobhaidh na rannpháirtithe deis bualadh le scéalaithe áitiúla agus páirt a ghlacadh i liotúirge dúchais. Gheobhaidh na rannpháirtithe léargas iomlán ar sheanlitríocht na hÉireann trí lámhscríbhinní agus aistriúcháin. Pléifear roinnt téacsanna go mion.
Dátaí: An tseachtain leathdhéanach d'Áibreán
Costas: 360 euro

Oilithreacht Siúlóide Ealaíne
Oilithreacht Siúlóide é seo a mhairfidh aon lá déag bunaithe ar thréithe slánaithe thraidisiún na hOilthreachta in Éirinn. Gheobhaidh na rannpháirtithe blaiseadh de thalamh agus de chultúr Chorca Dhuibhne agus spreagfar iad chun doiciméadú a dhéanamh i bhfoirm ealaíonta. Tosnóidh an turas le léachtaí ar stair, ar thraidisiún agus ar chultúr Chorca Dhuibhne i nDíseart. Ina dhiaidh sin, tosnóidh rannpháirtithe ar shiúlóid a thabharfaidh cuairt ar shuíomhanna ársa na dúthaí, agus a shúfaidh isteach an radharc tíre mealltach, na sléibhte loma agus na gleannta glasa. Le linn an turais, beidh a lán ama le machnamh cruthaitheach a dhéanamh chun ealaín a chruthú. Spreagfar rannpháirtithe i pé gné den ealaín is áil leo siúd - péintéireacht, tarraingeoireacht, sceitseáil, grianghrafadóireacht, scríbhneoireacht, dealbhadóireacht nó aon fhoirm eile gur mian leo. Cuirfear críoch leis an oilithreacht sa Daingean le deis plé agus taispeántais.
Dátaí: Deireadh Bealtaine
Costas: 430 euro

Bunchúrsa sa Chultúr Dúchais, cúrsaí coicíse, leibhéal 2
I leibhéal a dó den chúrsa seo beidh deis ag rannpháirtithe a dhein leibhéal a haon den chúrsa seo, nó ag rannpháirtithe go bhfuil taithí áirithe i gcultúr Gaelach nó Ceilteach acu cheana; dírítear ar dhá ghné ar leith den chultúr ceilteach - litríocht, teangacha, stair, ceol, béaloideas, spioradáltacht, nó seandálaíocht.
Dátaí: An tseachtain deiridh de Bhealtaine agus an chéad sheachtain de Mheitheamh
Costas: 590 euro

Scoileanna Samhraidh
Bíonn Scoileanna Samhraidh againn i gcomhar le hInstitúidí Triú Leibhéal agus grúpaí ar spéis leo Cultúr agus Spiradáltacht Ghael e.g. Scoil Cheoil Eaglasta, Scoil Rince agus Cheoil Thraidisiúinta.
Scoil Samhraidh Spioradáltachta
Costas: 360 euro

Cúrsaí Fómhair 2008/2009
Tosnóidh cúrsaí oíche páirt-aimseartha do dhaoine atá ag maireachtaint sa cheantar i mí Meán Fómhair agus Deireadh Fómhair. I measc na gcúrsaí atá beartaithe ag Díseart don bhFómhar 2009 tá Teastas i Seandálaíocht na hÉireann, Teastas i Stair na hEalaíne, Teastas sa bhFeirmeoireacht Orgánach, Cúrsa i gCócaireacht agus Bácáil Traidisiúnta, Bun-Staidéar ar Chultúr agus ar Litríocht Chorca Dhuibhne, Cúrsa i Scríbhneoireacht Chruthaitheach, Ranganna Ceoil agus Dioplóma i Staidéar Ban. I measc na gcúrsaí atá pleanálta don bhFómhar 2009 tá Teastas sa Cheol Traidisiúnta, Teastas i litríocht Chorca Dhuibhne agus céim pháirt-aimseartha nó Teastas Léann Dúchais i gcomhar hOllscoil na hÉireann agus Ollscoil Phápúil Mhaigh Nuad. Fáiltíonn Díseart roimh smaointe mar gheall ar chúrsaí nua eile chomh maith. Is féidir teagmháil a dhéanamh chun do mholtaí/thuairimí ar chúrsaí nua a thabhairt tríd an seoladh ríomhphoist: info@diseart.ie nó ar an bhfón + 353 66 9152476.